काठमाडौँ – व्यापारीको भेषमा करोडौँ रुपैयाँ ठगी गर्ने एक महिलालाई काठमाडौँ उपत्यका अपराध अनुसन्धान कार्यालयको टोलीले पक्राउ गरेको छ ।

पक्राउ पर्नेमा ३९ वर्षकी कल्पना गैरे रहेकी छिन् । पाल्पा घर भइ कैलालीको धनगढी उपमहानगरपालिका बस्दै आएकी उनी मिटर ब्याजीका नामले पनि परिचित छिन् । मिटर ब्याजमा ठगी गरेको भन्दै केही समयअघि उनी धनगढीको चौराहामा कुटिएकी थिइन् । उद्योग वाणिज्य संघको केन्द्रीय सदस्यसमेत भइसकेकी उनी कैलालीको अत्तरिया र धनगढीमा 'धर्मरुद्र' नामक अस्पताल सञ्चालन गर्दै थिइन्, जुन अहिले बन्द अवस्थामा रहेको छ । उनी विभिन्न बहानामा ठगी गर्ने गिरोहकी मुख्य सदस्यका रूपमा चिनिन्छिन् ।

कैलालीमा धेरैको पैसा ठगी गरेपछि उनी पछिल्लो समय पोखरामा लुकेर बसेकी थिइन् । तर, अहिले भने उनलाई प्रहरीले पक्राउ गरेको छ । गणेश ढकालको जाहेरीका आधारमा उनलाई बानेश्वरको गैरीगाउँबाट पक्राउ गरिएको प्रहरीले जनाएको छ । काठमाडौँ जिल्ला अदालतले उनलाई पक्राउ गर्न आदेश जारी गरेपछि अपराध अनुसन्धान कार्यालयले उनलाई पक्राउ गरी आवश्यक अनुसन्धानको लागि काठमाडौँको माइतीघर प्रहरी कार्यालय पठाएको हो ।

उनीमाथि जवरजस्ती चोरी गरी ठगी र अपराधिक लाभ लिएको आरोप लागेको छ । प्रहरीले अधिकारीहरूका अनुसार, उनलाई तुरुन्तै पक्राउ नगरेमा प्रमाण नष्ट हुने र उनी फरार हुन सक्ने सम्भावना रहेकाले शुक्रबार नै पक्राउ गरी आवश्यक अनुसन्धान थालिएको छ ।